Jabaan Waxay Adkaynaysaa Xidhiidhka US; Ishiba
Ra’iisul Wasaaraha Japan Shigeru Ishiba ayaa sheegay in Japan ay adkayn doonto “xidhiidhka” wadahadallada kala dhaxeeya Mareykanka ee ku saabsan heerka is-weydaarsiga lacagaha, xilli ay sii xoogeysanayaan xiisadaha ganacsi ee u dhaxeeya labada dal iyadoo ay si gaar ah u taagan tahay arrinta cashuuraha uu Trump saaray. Ishiba, oo ka hadlayay barnaamij TV-ga NHK, wuxuu muujiyay in Tokyo ay kordhin karto iibsiga shidaalka Mareykanka wuxuuna sheegay inay diyaar u yihiin dabacsanaan ku aaddan eedeymaha Mareykanka ee la xiriira caqabadaha aan cashuurta ahayn ee ka jira suuqa gawaarida Japan. Trump – oo si lama filaan ah uga qeybgalay wareeggii ugu horreeyay ee wadahadallada U.S.-Japan Arbacadii, isagoo sheegay in “horumar weyn la sameeyay” – wuxuu sheegay inuu doonayo in wadahadallada ku daro eedeyntiisa ah in Tokyo si ula kac ah u daciifiso lacagta yen-ka si ay uga dhigto dhoofiyaasha Japan kuwo wxsoosaar badan sameeya. Ishiba wuxuu sheegay in wadahadallo gaar ah oo ku saabsan siyaasadda lacagta ay dhex mari doonaan Wasiirka Maaliyadda Japan Katsunobu Kato iyo Xoghayaha Maaliyadda Mareykanka Scott Bessent. “Waxaan arrintan uga baaraan-degi doonnaa si caddaalad ku jirto,” ayuu yiri Ishiba, markaas oo la weydiiyay sida Japan uga falcelin doonto haddii Mareykanku ka codsado taageero lagu xoojinayo yen-ka. Japan oo beenisay in ay si ula kac ah u maamusho lacagta yen-ka, ayaa sanadihii la soo dhaafay u dagaallamaysay in aysan daciifin si aysan u dhaawicin dhaqaalaha ku tiirsan dhoofinta. Hase yeeshee sanadkii hore ayay faragelin ku samaysay suuqyada sarrifka si ay u xoojiyaan lacagta yen-ka. Kato ayaa qorsheynaya inuu toddobaadkan tago Washington si uu uga qeyb galo kulanka wasiirada maaliyadda ee kooxda G20 oo ka dhici doona kulanka Hay’adda Lacagta Adduunka (IMF). Waxaa la filayaa inuu la kulmo Bessent si ay u yeeshaan wadahadallo ganacsi oo gaar ah. WAXAA SUURTOGAL AH IN JABAAN KORDHIYSO IIBSIGA TAMARTA MAREYKANKA Qaar ka mid ah falanqeeyeyaasha ayaa sheegaya in Japan ay isticmaali karto kaydkeeda weyn ee deynta ay ku leedahay Mareykanka – oo ah tan ugu badan adduunka, in ka badan $1 trillion – si ay ugu gorgortamaan, laakiin Kato ayaa bishan sheegay inaan tan loo adeegsan doonin sidii hub gorgortan. “Arrintani waxay ku saleysan tahay kalsooni labada dhinac dhexdooda ah, xasilloonida dhaqaalaha caalamiga ah iyo sidoo kale xasilloonida dhaqaale ee labada dal,” ayuu yiri Ishiba markaas oo la weydiiyay haddii Japan ay u xusi doonto Mareykanka deynta ay ku leedahay inta lagu guda jiro wadahadallada. Trump ayaa Japan ku soo rogay cashuur dhan 24% oo ku saabsan dhoofinta ay u dirto Mareykanka, inkastoo cashuuraha kale ee uu Trump saaray ay haatan hakad ku yihiin ilaa horraanta Luulyo. Waxaase weli taagan cashuur guud oo ah 10% ah iyo sidoo kale cashuur gaar ah oo ah 25% oo lagu soo rogay gawaarida – taasoo laf-dhabar u ah dhaqaalaha dhoofinta ee Japan. Ishiba wuxuu sidoo kale muujiyay diyaar u ahaansho ah in Japan ay maalgelin weyn ku sameyso Mareykanka, gaar ahaan dhinaca tamarta. “Marka laga hadlayo gaaska dabiiciga ah ee la dareeriyey, Australia ayaa ah dalka ugu badan ee aan ka soo iibsanno. Mareykanku wuxuu hadda ku jiraa kaalinta afaraad. Waxaa suurtogal ah inaan kordhino iibsiga. Laakiin su’aashu waa: Mareykanku ma awoodayaa inuu si joogto ah u keeno (tamarta)?” ayuu yiri.
