Dareenka Macaamiisha (Prelim UoM Consumer Sentiment) oo Si Daran Hoos Ugu Dhacay
Bishii May 2025, dareenka macaamiisha Mareykanka ayaa si lama filaan ah hoos ugu dhacay. Tiro-koobka jaamacadda Michigan ee lagu cabbiro niyadda macaamiisha ayaa hoos uga dhacay 52.2 bishii Abriil ilaa 50.8 bishii May, halka saadaasha ahayd inuu kor ugu kaco ilaa 53.4. Tani waxay noqonaysaa heerkii ugu hooseeyay tan iyo 1980-kii.
Hoos u dhacaasi wuxuu si weyn ugu xiran yahay walaaca sii kordhaya ee shacabka Mareykanka ka qaba siyaasadaha ganacsi ee Madaxweyne Donald Trump, kuwaas oo ay si toos ah u xuseen ku dhowaad 75% dadka la wareystay, iyadoo bishii hore ay ahayd 60%.
Dhinaca kale, filashada sicir-bararka ee shacabka ayaa cirka isku shareertay. Dadka ayaa filaya in sicir-bararku gaaro 7.3% sanadka soo socda, taas oo ah heerkii ugu sarreeyay tan iyo Noofambar 1981, iyadoo bishii hore ahayd 6.5%. Xitaa filashada muddada-dheer ee sicir-bararka ayaa gaartay 4.6%, heer aan la gaarin tan iyo Maarso 1991.
Waxaa saameyn ku yeeshay filashadan sare ee sicir-bararka digniino ka yimid ganacsiyada waaweyn sida Walmart oo sheegay inay sare u qaadi doonaan qiimaha alaabaha, sababo la xiriira kororka kharashaadka soo dejinta.
Inkastoo Mareykanka iyo Shiinuhu dhawaan ku heshiiyeen xabbad-joojin ganacsi, cawaaqibta canshuuraha la saaray ayaa wali waxyeello ku haya dhaqaalaha. Dhaqaaluhu wuxuu hoos u dhacay rubucii koowaad ee sanadka—markii ugu horreysay muddo saddex sano ah—iyadoo iibka tafaariiqdu uu ahaa mid taagdaran bishii Abriil. Mas’uuliyiinta Federal Reserve waxay muujiyeen walaac ah in canshuuraha socda ay caqabad ku noqon karaan dadaallada lagu yareynayo sicir-bararka, taasoo adkeyn karta go’aanada siyaasadda lacageed.
Inkasta oo suuqyada maaliyadeed ay muujinayaan dib u soo kabasho, haddana tilmaamayaasha dhaqaale ee hoose waxay muujinayaan taxaddar. Farqiga u dhexeeya rajada suuqyada iyo niyad-jabka macaamiisha ayaa muujinaya xaaladda cakiran ee ay wajahaan samaynta siyaasadda iyo maalgashadeyaashu.
